Sögufélag Fischersundi 3, 101 Reykjavík s.551 4620 netfang: sogufelag@sogufelag.is

Sögufélag
á Facebook

Afgreiðslutími
Afgreiðsla Sögufélags hefur opnað aftur eftir sumarleyfi. Opið er mánudaga til fimmtudaga kl. 14-18.


21.6.2010
Sumarlokun
Afgreiðsla Sögufélags verður lokuð frá 22. júní til 9. ágúst. Félagsmenn og viðskiptavinir eru beðnir um að snúa sér til forseta félagsins, Önnu Agnarsdóttur, eða Ólafs Rastrick varðandi bókapantanir eða aðrar upplýsingar um útgáfu Sögufélags.

Anna Agnarsdóttir: netfang: annaagn@hi.is - sími: 899 8854
Ólafur Rastrick, netfang: olr1@hi.is - sími: 894 1461
 

13.6.2010
Nýtt rit frá Sögufélagi: FERÐADAGBÆKUR MAGNÚSAR STEPHENSEN 1807–1808
Anna Agnarsdóttir og Þórir Stephensen sáu um útgáfuna

Árið 1807 gerðu Bretar stórskotaárás á Kaupmannahöfn og gengu Danir þá í lið með Frökkum. Breski flotinn var allsráðandi í norðurhöfum og hertók flest Íslandsskip. Magnús Stephensen var á einu þessara skipa og í þremur dagbókarbrotum frá 1807–1808 lýsir hann ferð sinni, hertökunni, dvöl sinni í Leith og Kaupmannahöfn og tilraunum sínum til að koma landsmönnum til hjálpar. Hann gaf út Eftirmæli átjándu aldar á dönsku, skrifaði fræðigreinar, nam ensku og sótti tónleika og veislur hjá fyrirmönnum. Napóleonsstyrjaldirnar eru alltaf í bakgrunninum, Kristján VII deyr og Friðrik VI tekur við ríkjum. Loks segir hann frá dvöl sinni í Björgvin þar sem hann leitaðist við að semja við norska kaupmenn um Íslandssiglingu. Einnig er hér birt ferðadagbók hans frá haustinu 1799.
Bókin er xlviii + 190 blaðsíður að lengd, 19 myndir, viðaukar og nafnaskrá.
 

28.5.2010
Framtíð Sögufélags - félagsfundur
Frá stjórn Sögufélags: Félagsfundur verður haldinn fimmtudaginn 3. júní kl. 20 í húsakynnum Sögufélags, Fischersundi 3. Rædd verður bág fjárhagsstaða félagsins og mun stjórnin kynna hugmyndir sínar um breytingar á rekstri þess. Markmið breytinganna er að standa vörð um útgáfustarfsemina nú þegar hvers konar menningarstarfsemi í landinu á undir högg að sækja. Stjórn félagsins vill leggja kapp á að tryggja að Saga geti áfram komið út ásamt öðrum þeim ritum sem félagið hefur í bígerð. Vorhefti Sögu er nýkomið út og Ferðadagbækur Magnúsar Stephensen 1807-1808 fara í prentun strax eftir helgi. Annað smárit er í undirbúningi sem vonast er til að komi út á þessu ári. Þá er stefnt að talsverði útgáfu á næsta ári. Stjórnin hvetur áhugasama félagsmenn að mæta og taka þátt í umræðum um stöðu félagsins í núverandi kreppu.
 

25.5.2010
Vorhefti Sögu 2010
Vorhefti Sögu 2010 kom út föstudaginn 21. maí. Elín Hafstein, fædd árið 1869 á Möðruvöllum í Hörgárdal, prýðir forsíðu tímaritsins að þessu sinni sem inniheldur fjölbreytt efni að vanda. Auk greinar Sigrúnar Sigurðardóttur um efni forsíðunnar skulu fyrst nefndar tvær greinar. Sú fyrri er eftir Davíð Ólafsson og fjallar um alþjóðlega strauma í rannsóknum á handritamenningu síðari alda og hvernig þær rannsóknir geta nýst til skilnings á íslenskri bókmenningu eftir siðaskipti. Sú síðari er eftir Rósu Magnúsdóttur og fjallar um íslenskar ferðalýsingar á Sovétríkjunum. Í nýjum bálki Sögu sem nefnist „Sögur og tíðindi“ birtast tvær greinar. Karl Aspelund skrifar um handrit að ferðabók um Ísland sem nýlega fannst í bókasafni í Bandaríkjunum, og Ingólfur Ásgeir Jóhannesson segir okkur frá þjálfun bandarískra geimfara á Íslandi á 7. áratugnum. Þá heldur deila Jóns Ólafssonar og Þórs Whitehead um samskipti íslenskra kommúnista og Komintern áfram með svari Jóns í viðhorfsgrein.
Spurning Sögu varðar sögulegar rætur 26. greinar stjórnarskrárinnar, sem kveður á um vald forseta til að synja lagafrumvarpi staðfestingar. Auk þess að varpa ljósi á forsögu þessa ákvæðis – í svörum sérfræðinganna koma fram ýmsar nýjar sögulegar staðreyndir um tilurð þess – og ólíkan skilning á því í tímans rás, má ætla að svör sérfræðinganna sem hér birtast geti orðið innlegg í umræðu um endurskoðun stjórnarskrárinnar og framtíð forsetaembættisins.
Í vorhefti Sögu birtast nú 11 ritdómar, flestir um bækur sem komu út á síðasta ári. Að lokum skulu nefnd erindi sem flutt voru í tilefni veitingar doktorsnafnbótar í heiðursskyni til Ólafíu Einarsdóttur í nóvember árið 2009. Ólafía var frumkvöðull á ýmsum sviðum, meðal annars var hún fyrst íslenskra kvenna til að ljúka doktorsprófi í sagnfræði.
 

11.5.2010
Afgreiðsla lokuð
Verslun Sögufélags verður lokuð um óákveðinn tíma. Hægt er að panta bækur með því að senda beiðni á netfangið annaagn@hi.is

Eldri fréttir

SAGA
TÍMARIT
SÖGUFÉLAGS

-> um Sögu
____

SMÁRIT
SÖGUFÉLAGS

                      Sögufélag - Fischersundi 3 - 101 Reykjavík - sími: 551 4620 - netfang. sogufelag@sogufelag.is