Sögufélag Fischersundi 3, 101 Reykjavík s.551 4620 netfang: sogufelag@sogufelag.is

Sögufélag
á Facebook

Bókamarkaður Sögufélags og Hins íslenska bókmenntafélags

Fræðirit fyrir fróðleiksfúsa

Bókamarkaður Hins íslenska bókmenntafélags og Sögufélags verður haldinn í Skeifunni 3b, dagana 18. til 27. janúar.

Hundruð bókatitla
Allar bækur eru á 30 til 70% afslætti, þar á meðal Lærdómsrit, Íslensk fornrit, sagnfræðirit, heimspeki ofl.
Sérvaldir titlar á enn meiri afslætti eða allt niður í 50 krónur.

Opið 9 til 18 virka daga, laugardag kl. 11 til 16 og sunnudag frá 13 til 16.

Allir fá bókagjöf.

Sjálfsmynd, einkavæðing, Gamli sáttmáli, Sovét-Ísland og ævisögur
Hausthefti Sögu 2011 er komið út. Meðal efnis að þessu sinni má nefna grein eftir Clarence E. Glad um áhrif grísk-rómverskrar arfleifðar á sjálfsmynd Íslendinga á tímum sjálfstæðisbaráttunnar. Björn Jón Bragason sagnfræðingur skrifar um orsakir og aðdraganda einkavæðingar Búnaðarbankans í byrjun árs 2003. Saga birtir í fyrsta skipti grein á ensku en það er svar brasilísku fræðikonunnar Patriciu P. Boulhosa við gagnrýni Helga Skúla Kjartanssonar á kenningu hennar um aldur Gamla sáttmála. Skafti Ingimarsson skrifar hugleiðingu um nýlega bók Þórs Whitehead, Sovét-Ísland, óskalandið, en auk þess eru birt í þessu hefti tímaritsins ritdómar um nýleg sagnfræðiverk og andmæli við doktorsvörn. Þá skrifa nokkrir fræðimenn stuttar hugleiðingar um ævisagnaformið. Á kápu Sögu er mynd af kóngi og drottningu eftir Jón Bjarnason bónda í Vatnsdal frá því um miðja 19. öld.
 

8.12.2011
Bók Páls Björnssonar tilnefnd til Íslensku bókmenntaverðlaunanna
Þann 7. desember kom út á vegum Sögufélags rit Páls Björnssonar sagnfræðings: Jón forseti allur? Táknmyndir þjóðhetju frá andláti til samtíðar. Bókin er tilnefnd til Íslensku bókmenntaverðlaunanna.
Í bókinni fjallar Páll um framhaldslíf sjálfstæðishetjunnar Jóns Sigurðssonar. Hann lýsir því á nýstárlegan hátt hvernig minningarnar um Jón forseta hafa gengið í endurnýjun lífdaga með hátíðahöldum, sögusýningum, pílagrímastöðum, minnismerkjum, kveðskap, bókaútgáfu, minjagripum og myndverkum. Sjálfur fæðingardagur hans varð að nýrri Jónsmessu eftir harðar deilur, enda hefur Jón iðulega verið dreginn inn í ágreiningsmál sem efst eru á baugi hverju sinni, meðal annars á sviði utanríkismála. Þá er fjallað ítarlega um það á hvern hátt stjórnmálamenn, félagasamtök, fyrirtæki og almenningur hafa fært sér táknmynd Jóns í nyt, hver með sínum hætti.
    Jón Sigurðsson birtist hér í nýju ljósi. Táknmynd hans er samofin íslenskum veruleika og þótt fjöldinn allur viti ekki lengur í hverju framlag hans fólst í lifanda lífi, þá lifir ímynd hans enn sem eitt mikilvægasta sameiningartákn þjóðarinnar.
 

7.12.2011
Bókakynning Sögufélags og Hins íslenska bókmenntafélags
Fimmtudagskvöldið 8. desember, kl. 20:00-22:00 verður kynning á nýjum bókum Sögufélags og Hins íslenska bókmenntafélags í húsi Sögufélags við Fischersund í Reykjavík. Höfundar eða aðrir fjalla um eftirtalin verk:
Páll Björnsson: Jón forseti allur? Táknmyndir þjóðhetju frá andláti til samtíðar.
Yfirrétturinn - Dómar og skjöl. Björk Ingimundardóttir og Gísli Baldur Róbertsson sáu um útgáfuna.
Ekkert nýtt, nema veröldin. Bréfaskipti Gríms Thomsen og Brynjólfs Péturssonar. Aðalgeir Kristjánsson og Hjalti Snær Ægisson tóku saman.
Margrét Gunnarsdóttir, Ingibjörg.
Morkinskinna. Ármann Jakobsson og Þórður Ingi Guðjónsson gáfu út.
Herman Lindqvist, Napóleon. Borgþór Kjærnested þýddi úr sænsku.
R. N. Stewart, Íslenskar veiðiár. Einar Falur Ingólfsson þýddi úr ensku.
Pétur Pétursson, Trúmaður á tímamótum. Ævisaga Haralds Níelssonar.
Léttar veitingar verða á boðstólum og allir eru velkomnir. Bækur verða til sölu og höfundar árita.
 

1.12.2011
JÓN FORSETI ALLUR?
Þann 7. desember kemur út á vegum Sögufélags rit Páls Björnssonar sagnfræðings: Jón forseti allur? Táknmyndir þjóðhetju frá andláti til samtíðar. Jón varð að þjóðhetju með forystu sinni í sjálfstæðisbaráttu Íslendinga á 19. öld. Allt frá andláti hans árið 1879 hafa landsmenn hagnýtt sér minningu hans með fjölbreyttum hætti: t.a.m. með sögusýningum, hátíðarhöldum, minnismerkjum, kveðskap, bókaútgáfu,
minjagripum, myndverkum og pólitískum deilum. Bókin dregur fram og skýrir á hvern hátt opinberir aðilar, félagasamtök, fjölmiðlar, stjórnmálamenn, fyrirtæki og almenningur hafa gert sér mat úr táknmynd Jóns. Nýstárleg bók um Jón forseta.
Ritið er tilnefnt til íslensku bókmenntaverðlaunanna.
 

30.11.2011
INGIBJÖRG
Í þessari bók varpar sagnfræðingurinn Margrét Gunnarsdóttir nýju ljósi á ævi og umhverfi Ingibjargar Einarsdóttur eiginkonu Jóns Sigurðssonar, Reykjavíkurdömunnar sem varð borgarafrú í Kaupmannahöfn. Hverjar voru rætur hennar? Hvernig heimili hélt hún í Kaupmannahöfn? Hvernig eiginkona var hún? Hvaða störfum sinnti hún í önn dagsins? Tímabær bók um svipmikla konu sem löngum hefur staðið í skugga eiginmanns síns.
Ritið er gefið út af Bókafélaginu Uglu í samvinnu við Sögufélag.
 

28.11.2011
EKKERT NÝTT, NEMA VERÖLDIN
Í nýrri bók í smáritaröð Sögufélags eru birt öll varðveitt bréf á milli Gríms Thomsens og Bryjólfs Péturssonar. Í bréfunum má finna ferðalýsingar, bókmenntarýni, leikhúsdóma, lifandi umræðu um þjóðmál og hressandi slúður um samlanda þeirra í Kaupmannahöfn.
Útgefendur bréfanna eru Aðalgeir Kristjánsson og Hjalti Snær Ægisson.

 

28.11.2011
YFIRRÉTTURINN Á ÍSLANDI
Út er komið fyrsta bindið í ritröðinni Yfirrétturinn á Íslandi - Dómar og skjöl á vegum Sögufélags og Þjóðskjalasafns Íslands. Verkið má panta með því að senda tölvupóst á netfangið sogufelag@sogufelag.is eða hringja í síma 551-4620. Verð bókarinnar er 14.900 kr. Yfirrétturinn á Íslandi starfaði á árunum 1563–1800. Stefnt er að því að gefa út heildarsafn varðveittra gagna frá yfirrétti og aukalögþingum, en þau skjöl eru raunar hluti af sögu Alþingis hins forna. Áætlað er að þetta heildarsafn varðveittra gagna frá yfirréttinum komi út í átta bindum á næstu árum.
Í fyrsta bindi verksins er fræðileg ritgerð eftir Björk Ingimundardóttur um sögu og starfsemi yfirréttarins, auk yfirlits yfir mál sem líklega hafa farið fyrir yfirrétt, en dómar og málsskjöl eldri en frá árinu 1690, og óyggjandi má telja upprunnin frá yfirrétti, hafa ekki varðveist. Fjöldi mynda af skjölum, innsiglum og undirskriftum er birtur í ritinu, auk nokkurra teikninga frá Þingvöllum frá fyrri öldum. Allmörg skjöl eru birt sem varpa ljósi á stofnun og starfsemi yfirréttarins. Megintexti bókarinnar er síðan dómar og málsskjöl frá árunum 1690-1710. Í viðauka eru birt ýmis skjöl sem bregða ljósi á málsatvik einstakra dóma og mála sem fyrir réttinn komu.
 

Eldri fréttir

SAGA
TÍMARIT
SÖGUFÉLAGS

-> um Sögu
____

SMÁRIT
SÖGUFÉLAGS

                      Sögufélag - Fischersundi 3 - 101 Reykjavík - sími: 551 4620 - netfang. sogufelag@sogufelag.is